ل ژێر چاڤدێریا وەزارەتا خواندنا بلند و ڤەکۆلینێن زانستی یا هەرێما کوردستانێ و ب ئامادەبوونا ژمارەکا سەرۆک زانکۆ، هاریکارێن سەرۆک زانکۆیان، ڕاگرێن کۆلیژان، ڤەکۆلەر و مامۆستایێن ناڤەندێن خواندنێ یێن هەرێما کوردستانێ و عێراقێ، ئەڤرۆ چوارشەمبی ڕێکەفتی (٢٠٢٦/٦/١٧) ب شانازیڤە زانکۆیا مە "زانکۆیا زاخۆ" مێڤانداریا ڕۆژا ئێکێ یا ئێکەمین کۆنفرانسێ نێڤدەولەتی یێ ژیرییا دەستکرد د ئەندازیاری و زانستێن کرداری دا (ICAIEAS2026) کر.
ئەڤ کۆنفرانسە، کو ب هەڤپشکیا زانکۆیا زاخۆ لگەل زانکۆیێن (پۆلیتەکنیک دهۆک، شرنەخ، سۆران و ئاکرێ یا زانستین کرداری) هاتیە ڕێکخستن، دێ بۆ دەمێ دوو رۆژان بەردەوام بیت (١٧-١٨ێ حوزەیرانا ٢٠٢٦).
کۆنفرانس ب رێزگرتن ل سەر گیانێ پاکێ شەهیدان دەستپێکر. پاشان، پەیڤا زانکۆیا زاخۆ و زانکۆیێن هەڤپشک ژلایێ بەرێز "پ. د. دیار عبدالکریم سعید" سەرۆکێ زانکۆیا زاخۆ ڤە هاتە پێشکێشکرن. د پەیڤا خۆ دا گوت: "ئارمانجا مە یا سەرەکی ئەوە مفایێ ژ نویترین دەستکەفتێن زانستی وەرگرین. ژیرییا دەستکرد نە بتنێ مژارەکا تەکنۆلۆژی و زانستییە، بەلکو دیاردەیەکا شارستانییە و دشێت ڕێرەوا مرۆڤایەتیێ بۆ دەهان سالێن داهاتی بگوهۆڕیت." هەروەسا سوپاسیا حکومەتا هەرێما کوردستانێ و وەزارەتا خواندنا بلند کر بۆ پشتەڤانیا وان د سەرئێخستنا ڤی کۆنفرانسی دا.
ژلایەکێ دیڤە، پەیڤا وەزارەتا خواندنا بلند و ڤەکۆلینێن زانستی یا هەرێما کوردستانێ ژلایێ بەرێز (د. ٲمیر عبدالرحمن چالی) بریکارێ وەزارەتا خواندنا بلند و ڤەکۆلینێن زانستی ڤە هاتە پێشکێشکرن. د پەیڤا خۆ دا، دەستخۆشی ل زانکۆیا زاخۆ و زانکۆیێن هەڤپشک کر و گرنگیا ئەنجامدانا ئەڤان جۆرە کۆنفرانسان وەک پێنگاڤەکا زانستی یا گرنگ بۆ پێشڤەچوونا هەرێمێ دازانین.
د بەردەوامیا بەرنامەیێ کۆنفرانسی دا، ڤیدیۆیەکا دۆکیۆمێنتاری ل سەر زانکۆیێن ڕێکخەر هاتە نیشاندان، و پاشی کورتیەک ل دۆر کۆنفرانسی ژلایێ (پ. هـ. د. جاسم محمد عبدو) ڤە هاتە پێشکێشکرن.
پشتی رێورەسمێن ڤەکرنێ، پەیڤدارێن سەرەکیێن کۆنفرانسێ (Keynote Speakers) بابەتێن خۆ پێشکێشکرن، کو پێکدهاتن ژ: (پ. هـ. د. مەسعود، م. حەسەن، پ. د. طارق، پ. رەشید، د. ئەرسەلان، ر. میرزا، پ. د. محەمەد، م. عانی ب رێکا ئۆنلاین، پ. هـ. د. مێڤان، ب. م. عەبدولرەزاق).
ل دویماهیا رێورەسمێن ڤەکرنێ، سوپاسنامە و ڕێزلێنان ل سەر پشکداران هاتنە بەلاڤکرن، و پشتی بێهنڤەدانا نیڤرۆ، ڕۆینشتنێن تەکنیکی ل هۆلێن جودا جودا یێن زانکۆیا مە هاتنە برێڤەبرن.
دهێتە چاڤەرێکرن کو سباهی پێنجشەمبی، ١٨ێ حوزەیرانا ٢٠٢٦، رۆژا دوماهیێ یا کۆنفرانسی ب ڕۆینشتنێن تەکنیکی ل دەمژمێر ١٠ێ سپێدێ دەستپێبکەت، و ڕێورەسمێن بدویماهیک ئینانێ و پێشکێشکرنا ڕاسپاردەیان ل دەمژمێر ١٢ێ نیڤرۆ ژلایێ (پ. د. فرست حیتۆ عبدالرحمن) ڤە بڕێڤە بچن.